Alla Itolae Nusa 11

1

Kena akmenara tamata mei nusare esi sou esa kai esi lepataru sakesa.

2

Eleki kena esi keu bei otoi kena otoi sapaleuke lemataije sa, esi tetue otoi latale elake titinai me tape Sineare eleki esi rue ete mere.

3

Eleki esi beteke loko lomai be, “Mai ite kerike batu tela kai palae eti ekbere.” Eleki tela mere esi pake kena batu kai esi pake aspale kena kmulu batu tela meru kuru.

4

Kai esi beteke loko lomai be, “Mai ite Tamata menai eleke kota, lisi elake kai nanuke kai ite eleke esi lisi elake kai nanuke roma ndete lanite, leke iteki nane ela kai ite lila bei lomai mei nusa meije yake.”

5

Eleki TUHANE Irulu kena Iselu kota kai lisi rebe tamataru esi elekele.

6

Eleki Ibeteke be, “Sie meiju bangsa esa kai esi soure esa. Kai meije esi kerike menaije resa, hoko bei petu meije saisa rebe lalesi kena kerikele eono etesi neka.

7

Mise lesire Ite rulu leke Ite hohae esi soure leke esi lepa loko lomaije esi nati moneka.”

8

Hoko TUHANE Iono esi lila pusue nusare, kai esi hleke bei maka eleke kotare ele mere.

9

Ele mere hoko roma meije kota mere esi nane Babele. Le bei mere TUHANE Ihohae sou nusa meije kai bei mere TUHANE Ionosi lila bei lomai kena pusue nusa.

10

Meije Seme eni anubuaru. Kena Seme eni musuna utune esa, ruele eni nanae Arpaksate. Kena mere musuna lua bei kwelere lolo nusare pelare.

11

Kena ruele Arpaksate pelare, Seme irue musuna utana lima lekwe kai ruele kwete mokwai kai bina makete etei lekwe.

12

Eleki kena Arpaksate eni musuna butu telu lesini lima, ruele eni nanae Sela.

13

Kena ruele Sela pelare, Arpaksate irue musuna utana ata lesini telu lekwe kai ruele kwete mokwai kai bina makete etei lekwe.

14

Eleki kena Sela eni musuna butu telu, ruele eni nanae Ebere.

15

Kena ruele Ebere pelare, Sela irue musuna utana ata lesini telu lekwe kai ruele kwete mokwai kai bina makete etei lekwe.

16

Eleki kena Ebere eni musuna butu telu lesini ata, ruele eni nanae Peleke.

17

Kena ruele Peleke pelare, Ebere irue musuna utana ata butu telu lekwe kai ruele kwete mokwai kai bina makete etei lekwe.

18

Eleki kena Peleke eni musuna butu telu, ruele eni nanae Rehu.

19

Kena ruele Rehu pelare, Peleke irue musuna utana lua lesini sikwa lekwe kai ruele kwete mokwai kai bina makete etei lekwe.

20

Eleki kena Rehu eni musuna butu telu lesini lua, ruele eni nanae Seruke.

21

Kena ruele Seruke pelare, Rehu irue musuna utana lua lesini itu lekwe kai ruele kwete mokwai kai bina makete etei lekwe.

22

Eleki kena Seruke eni musuna butu telu, ruele eni nanae Nahore.

23

Kena ruele Nahore pelare, Seruke irue musuna utana lua lekwe kai ruele kwete mokwai kai bina makete etei lekwe.

24

Eleki kena Nahore eni musuna butu lua lesini sikwa, ruele eni nanae Tera.

25

Kena ruele Tera pelare, Nahore irue musuna utana esa butu esa lesini sikwa lekwe kai ruele kwete mokwai kai bina makete etei lekwe.

26

Eleki kena Tera eni musuna butu itu mina, pine ruele eni nanae Abrame, Nahore kai Harane.

27

Tera eni anubuaru esi meije: Tera eni nanae kena Abrame, Nahore kai Harane. Harane eni nanae kena Lote.

28

Harane imata me eni kota Ur-Kasdime. Kena mere amai Tera eri rue sa.

29

Eleki Abrame kai Nahore luasi kai. Abrame ikai kai Sarai yo Nahore ikai kai Milka. Milka mere Harane Eni nanae. Kai Harane eni nanae mokwai lekwe eni nane Yiska.

30

Sarai mere indote hoko eni nanae sae mo.

31

Eleki Tera ikeri eni nanae Abrame, upui Lote kai eni binbelu Sarai. Sarai mere Abrame eni bina. Esi siri bei Ur-Kasdime lope Kanane. Po esi roma me otoi Harane, esi rue ete mere.

32

Tera irue eti eni musuna utuna lua lesini lima eleki imata ete mere ne.

alkitab.me